Nýggja kommunustýrisskipanin endaliga samtykt

Nýggja kommunustýrisskipanin hjá Tórshavnar kommunu er nú endaliga samtykt. Tað hendi á býráðsfundinum í Havn í gjárkvøldið.

12 atkvøddu fyri og ein atkvøða var blonk, tann hjá Ruth Vang í Framsókn. Tá fyrra viðgerðin var 14. januar, atkvøddu øll fyri.

Meirilutin átti uppskotið

Uppskotið átti meirilutin í býráðnum, sum nú er Javnaðarflokkurin og Sambandsflokkurin. Eldranevndin fær nýtt navn og skal eita Heilsu- og eldranevndin.

Skúlaøkið verður flutt frá Mentamálanevndini til Trivnaðarnevndina. Vinnunevndin verður nýggj nevnd undir Fíggjarnevndini, og føst Havnarnevnd kemur í staðin fyri Vinnunevndina.

Kommunustýrisskipanin fyri Tórshavnar kommunu er frá 2001. Hon varð seinast broytt í 2017.