USA: 160 mió. skulu vera koppsett tjóðardagin

Amerikanski forsetin, Joe Biden, hevur kunngjørt eina nýggja tíðarætlan fyri koppsetingina í USA. Ætlanin er, at 70 prosent av øllum amerikanarum skulu hava fingið í øllum førum fyrra prikið fyri tjóðardagin, 4. juli.

Tað upplýstu Hvítu húsini í gjár, skriva Ritzau og Reuters. Sama dag skulu í minsta lagi 160 milliónir vaksin fólk í USA vera liðugt koppsett fyri COVID-19.

Tað svarar til umleið helmingin av øllum fólkunum í landinum, har tað búgva umleið 331 milliónir fólk. Í farnu viku vóru 101 millión fólk í USA - svarandi til 30,5 prosent - liðugt koppsett.