Stórt krassj á internetinum

Klokkan 10 í morgun krassjaðu heimasíðurnar hjá nøkrum av heimsins størstu fjølmiðlum, har millum BBC, CNN, The Guardian og Le Monde. Einki samband var heldur ikki við heimasíðurnar hjá bretsku stjórnini, eBay og Reddit. 

Heimasíðukrassjið tykist vera rættiliga umfatandi. 

Nú vísir tað seg, at orsøkin er eitt brek hjá stóru internetfyritøkuni Fastly, sum veitir tænastur av dátuferðslu á internetinum tvørtur um lond. Fastly er veitari hjá nøkrum av heimsins størstu heimasíðum.

Brekið varð staðfest í gjárkvøldið, men klokkan tíggju í morgun sløknaðu tænasturnar hjá Fastly fullkomiliga. Nú riggar aftur, og arbeitt verður við at umvæla brekið ordiliga. 

Enn hoyrist einki um, at føroyskar heimasíður eru merktar av stóra krassjinum.