Ákærdi í knívstunguni skal í landsrættin í øðrum máli

45 ára gamli maðurin, sum er ákærdur fyri at stinga ein annan mann í armin mikukvøldið, er eisini mitt í einu máli um grovan harðskap moti unnusti síni. 

Hann fekk í Føroya rætti eitt árs treytaleysa fongsulsrevsing í hesum málinum. Men maðurin skeyt tann dómin inn fyri Landsrættin, sum skuldi viðgera hann í dag.

Dómurin er so harður, tí maðurin hevur framt harðskap oftari enn eina ferð fyrr.

Noktar seg sekan

Í gjár var maðurin í grundlógaravhoyring, tí hann stakk ein annan mann í armin mikukvøldið. Skurðurin var okkurt um tveir sentimetrar.

Maðurin noktar seg sekan í at hava stungið við vilja. Men tað gjørdi hann so, sigur rætturin, sum varðhaldsfongslaði mannin í fýra vikur.

Hinir tveir menninir, sum vórðu tiknir í einari íbúð í Havn seint mikukvøldið, eru latnir leysir, men teir eru framvegis skuldsettir fyri harðskap móti manninum, sum nú er varðhaldsfongslaður.