Ber ikki til at vísa á gamlan prís

Tey, sum selja fýrverk, mugu ikki brúka fyrr og nú prísir.

Tað sigur Brúkaraumboðið í kunning um reglurnar um at marknaðarføra fýrverk.

At samanbera prísin, sum hann er nú, við ein gamlan prís, er villleiðandi marknaðarføring.

Frágreiðingin er, at fýrverk má bara verða selt eitt stutt tíðarskeið. 

Árstíðarvøra, sum fýrverk er, skal seljast fyri vanligan kostnað í fýra samanhangandi vikur, áðrenn prísurin kann lækka.

Pakkatilboð í lagi.

Brúkaraumboðið heldur tó ikki, at tað er villleiðandi at selja fýrverk við mongdaravsláttri ella sum pakkatilboð.

Seljarar kunnu til dømis marknaðarføra soleiðis: “eitt battarí fyri 400 kr., trý fyri 1000 kr., spari 200kr.” 

Ella “tvey battarí, fimm rakettir og tjúgu gívraýl” fyri ein samlaðan prís, sum er lægri enn, um vøran varð keypt hvør sær. 

Fortreytin er kortini, at seljarar samstundis hava eina veruliga sølu av vøruni hvørjari sær.

Loyvt er at selja fýrverk frá 27. til 31.desember.