Kommunurnar fingu 38 mió. kr. fleiri í fyribilsskatti í fjør

Tær 29 kommunurnar í landinum fingu 38,4 milliónir krónur fleiri í fyribilsskatti í fjør enn árið fyri.

Tað vísir fyribilsuppgerðin, sum Taks hevur gjørt av kommunuskattinum fyri 2021.

Tórshavnar kommuna eigur bróðurpartin av teimum 38,4 milliónunum, nevniliga 25,4 milliónir krónur. 

Tilsamans fekk Tórshavnar kommuna 892 milliónir krónur inn í fyribilsskatti. Vøksturin var 2,9 prosent.

19 kommunur meira í skatti

Tilsamans eru 19 kommunur, sum hava fingið fleiri inntøkur í fjør sammett við 2020.

Næstflestar meirinntøkur fekk Klaksvíkar kommuna, sum fekk 2,6 milliónir krónur í meirinntøku. 

Næst Klaksvíkar kommunu eru hesar:  Vága kommuna við 2,5 milliónum, Tvøroyrar kommuna við 2,2 milliónum, Nes kommuna við tveimum milliónum og Kvívíkar kommuna við 1,9 milliónum krónum fleiri í 2021 enn í 2020. 

10 kommunur fingu minni

10 kommunur í landinum fingu minni inn í skatti í fjør enn fyrraárið.

Tilsamans vóru tvær milliardir og 119 milliónir krónur goldnar í fyribils skatti í í fjør.

Landið fekk eina milliard og 801 millión krónur inn í fyribilsskatti í fjør. Tað eru 41,5 milliónir fleiri enn í 2020.

Fyribils kirkjuskatturin í fjør var 68,5 milliónir krónur. Tað eru 2,2 milliónir krónur fleiri enn í 2020.