Filip, Jana og Elisabeth kunnu vinna ítróttastjørnuskotið 2021

Flogbóltsspælarin, Filip Ilic, úr ÍF, H71-hondbóltsspælarin, Jana Mittún, og svimjarin, Elisabeth Erlendsdóttir, úr Havnar Svimjifelag eru í uppskoti til ítróttastjørnuskotið 2021.

Ítróttarsamband Føroya letur virðislønirnar á Ítróttarfagnaðinum, sum verður á Hotel Hilton 5. februar.

Filip Ilic hevur, hóast hann bert er 15 ára gamal, verið eyðsýndur á ÍF-liðnum, sum vann steypakappingina í fjør. Eisini hevur hann staðið seg væl í U-landsliðskappingum fyri Føroyar nýliga.

18 ára gamli H71-bakkurin, Jana Mittún, spældi ein avgerandi leiklut, tá H71 vann steypakappingina hjá kvinnum, og eisini hevur hon gingið undan í góðu úrslitunum, sum hoyvíkingar hava fingið í Evropa Cup-kappingini hjá EHF.

 Elisabeth Erlendsdóttur er 16 ár og svimur við Havnar Svimjifelag. Hon vann mest á FM í stuttgeil í novemberm og setti nýtt føroyskt met í 50 metur rygg. Uttanlands vann hon silvur og bronsu til NJM í Svøríki og tók eisini lut í HM í Abu Dabi í desember.

Umframt sjálvan heiðurin fær Ítróttastjørnuskotið eina peningaupphædd á 5.000 krónur. Ítróttafagnaðurin verður sendur beinleiðis í sjónvarpinum hjá Kringvarpi Føroya leygarkvøldið 05. Februar kl. 20:00.