Eriksen aftur á danska landsliðnum

Christian Eriksen er aftur á danska fótbóltslandsliðnum fyri fyrstu ferð, síðan hann fekk hjartasteðg í Parkini í EM-endaspælinum síðsta summar, skrivar DR.

Tað er greitt eftir úttøkuna hjá Kasper Hjulmand fyrrpartin týsdagin.

 - Eg havi verið í London og tosað við Christian. Hann er væl fyri, hann spælir væl og er avgerandi. Vit gleða okkum at fáa hann aftur í hópin, segði danski venjarin sambært Andreas Kraul frá DR.

Christian Eriksen skifti í januar úr Inter í bestu italsku deildini, har tað ikki er loyvt at spæla við hjartakvikli, til Brentford í ensku Premier League, har hann hevur staðið seg væl síðstu dystirnar.

Danmark skal spæla á útivølli ímóti Hollandi 26. mars og í Parkini ímóti Serbia 29. mars.