Føroyar og Grønland verða við í samráðingum um verju

Føroyar og Grønland verða tikin við, tá samráðingar verða um nýggja semju um verjuna í Danmark.

Tað sigur verjumálaráðharrin, Morten Bødskov, í svari til Sjúrð Skaale, fólkatingsmann. 

Stjórnin í Danmark og fýra flokkar í fólkatinginum hava gjørt avtalu um at gera nýggja semju um verju- og trygdarpolitikk. 

Ráðharrin svarar ikki beinleiðis spurninginum. 

Sjúrður Skaale spurdi, um landsstýrið ella aðrir myndugleikar í Føroyum vóru spurdir ella kunnaðir, áðrenn Forsætismálaráðið boðaði frá semjuni í tíðindaskrivi 6.mars.

Ráðharrin svarar, at sjálvandi verða Grønland og Føroyar við, tá samráðingar verða um nýggju verjusemjuna.

Ógreið kunning

Sambært svarinum er ógreitt, um landsstýrið ella aðrir myndugleikar í Føroyum vóru spurdir ella kunnaðir, áðrenn Forsætismálaráðið boðaði frá semjuni um at gera nýggja verjusemju í tíðindaskrivi 6.mars.

Fólkaatkvøða verður í Danmark 1.juni um at strika fyrivarnið, sum Danmark hevur um verjusamstarvið í ES. Føroyar eru ikki í ES. 

Men vísir tað seg, at ítøkilig ES-tiltøk hava serligan týdning fyri Føroyar, fer danska stjórnin sambært galdandi venju at seta seg í sambandi við landsstýrið, sigur Jeppe Kofod, uttanríkisráðharri, í svari til Sjúrð Skaale.