Ríkisfelagsskapurin eingin treyt, men lánveitarar skulu kunnast

Eingin treyt er í lánsavtaluni um fígging til Eysturoyar- og Sandoyartunnilin, at Føroyar skulu vera partur av ríkisfelagsskapinum í tíðarskeiðnum, sum avtalan fevnir um.

Tað sigur Uni Rasmussen, landsstýrismaður, sum hevur svarað fyrispurningi frá Jaspuri Langgaard, løgtingsmanni.

Men í avtaluni eru ávísar treytir, sum galda fyri bæði lántakara og lánveitarar.

Skulu kunnast

Koma týðandi broytingar, skal partafelagið Eystur- og Sandoyartunlar kunna lánveitararnar um tað, og bjóða teimum at fáa restlánið afturgoldið.

Tílíkar broytingar kunnu vera, at Føroyar fara úr ríkisfelagsskapinum, at landið selur ognir í felagnum, ella heimildin hjá felagnum at reka tunlarnar verður broytt.

Vilja lánveitarar av hesum orsøkum fáa lánsbrøvini afturgoldin í ótíð, verður neyðugt at endurfíggja tann partin av skuldini, sigur Uni Rasmussen í svarinum til Jaspur Langgaard.

Galdandi til 2040

Tunnilsfelagið fekk fígging til Eysturoyartunnilin og Sandoyartunnilin í desember í 2016 við keypsavtalu um lánsbrøv til útlendskar og føroyskar keyparar. 

Avtalan gongur til 31. januar í 2040.