Fleiri ábøtur skulu gerast í Vága- og Norðoyatunlunum

Hóast Vágatunnilin og Norðoyatunnilin fyri stuttum eru dagførdir fyri ávikavist 36,5 milliónir og 35,1 millión krónur, skulu fleiri ábøtur gerast. 

Millum annað skulu ljósini í Norðoyatunlinum skiftast, og arbeiðið verður mett at kosta millum 10 og 12 milliónir kr.

Tað hevur fíggjarnevndin fingið at vita frá báðum tunnilsfeløgunum, nú nevndin viðger samferðslupakkan. 

Viftur skulu eisini skiftast í báðum tunlunum. Tær flestu eru frá tíðini, tunlarnir lótu upp. 

Skulu dagsins trygdakrøv haldast, skulu 125 metrar vera millum telefonirnar í tunlunum. Í løtuni eru 250 metrar millum telefonirnar, sum eru frá tí, at tunlarnir lótu upp.

Rinda eftir ferðsluni

Partafelagið Tunnil hevur raksturin, viðlíkahaldið og innkrevjingina av gjøldunum í Vágatunlinum, Norðoyatunlinum og Eysturoyartunlinum, og greiður skilnaður er millum tunnilsfeløgini.

Útreiðslurnar í partafelagnum Tunli verða býttar millum feløgini eftir ferðsluni í tunlunum. 

Í fjør rindaði Vágatunnilin 22,7 prosent av kostnaðinum, Norðoyatunnilin 36,5 prosent og Eysturoyartunnilin, sum hevði mestu ferðsluna, rindaði sløk 41 prosent av kostnaðinum hjá partafelagnum Tunli.

Sambært samferðslupakkanum verða sjey milliónir kr. latnar í stuðli til Eystur- og Sandoyartunlar fyri at lækka prísirnar.

Fíggjarnevndin hevur fingið at vita, at verður ókeypis at koyra í Vága- og Norðoyatunlinum, mugu Eystur- og Sandoyartunlar rinda fyri alla innkrevjingina. 

Meirkostnaðurin hjá Eysturoyartunlinum verður mettur til hálva triðju millión kr.

Freist til flaggdagin 

Fíggjarnevndin hevur tvær ferðir fingið longda freist at leggja fram álit í málinum um samferðslupakkan.

Seinna freistin er flaggdagin, 25 apríl.

Fíggjarnevndin hevur fund aftur um samferðslupakkan týsdagin.