Fyrsti koronutilburðurin staðfestur í Norðurkorea

Stjórnin í Norðurkorea hevur boðað frá, at fyrsti tilburður av covid-19 nú er staðfestur í landinum.

Higartil hevur stjórnin í Pyongyang sagt, at landið hevur megnað at hildið koronu burtur og við tí forðað fyri, at fólkini í landinum, har búgva 26 milliónir, gerast sjúk av covid-19.

Tíðliga í morgun komu boðini um fyrsta tilburðin, sum myndugleikarnir kalla ein álvarsom hending, ið ávirkar trygdina í landinum.

Sambært frágreiðing frá stjórnini, er talan um omikron-frábrigdið. 

Norðurkoreanski leiðarin, Kim Jong-Un  kallaði alt fyri eitt til kreppufundar, har avgjørt var at seta í verk eina "hámarks-neyð-virus-ætlan" alt fyri eitt. 

Ætlanin hevur m.a. við sær, at strangari eftirlit verður við markið enn higartil, og at landið, býir og fólk, verða býtt í øki.