Danmark fyrsta landið at góðkenna svenskan og finskan NATO-limaskap

Danmark fer helst í næstu viku at boða frá, at landið, sum tað fyrsta, tekur undir við svenskum og finskum limaskapi í NATO.

Tað skrivar Ritzau.

Danska stjórnin fer í hesi vikuni at heita á fólkatingið um at góðkenna, at Svøríki og Finnland gerast limir í NATO.

Ætlanin er, at uppskotið verður lagt fyri fólkatingið í dag.

Jeppe Kofod fegnast

- Eg fegnist um, at Danmark, sum fyrsta av sameidu londunum, tekur stigið at tryggja Finnlandi og Svøríki limaskap í NATO, segði danski uttanríkisráðharrin, Jeppoe Kofod, eftir fund í uttanríkisnevndini hjá fólkatinginum í gjár.

Danska stjórnin hevur longu gjørt greitt, at hon tekur undir við, at Svøríki og Finnland gerast limir í NATO.

Men fyri at tað skal vera møguligt, mugu bæði stjórninar í londunum og núverandi limalond í verjusamgonguni góðkenna limaskapin.