Hálvfinalur í kvøld

Í kvøld verða fyrru hálvfinalurnar í steypakappingini við kvinnum spældar. 

NSÍ, sum vann steypakappingina í fjør, vitjar oddaliðið, KÍ, við Djúpumýrar í Klaksvík. 

Nógv bendir á, at talan verður um spennandi dyst. Liðini hava spælt tvær ferðir ímóti hvørjum øðrum í ár, og báðar ferðir endaði tað við javnleiki.

Í hinari hálvfinaluni hittast EBS/Skála og HB, sum liggja ávíkavist nummar trý og fýra í Betri-deildini. 

EBS/Skála var flúgvandi fyri summarsteðgin, men síðan hevur gingið av skriðuni. HB, hinvegin, hevur staðið seg væl í heyst, men tapti seinast, 3-0 í Sarpugerði fyri Víkingi.

Báðir dystirnir verða spældir klokkan 19.00, og seinnu hálvfinalurnar verða leygardagin 1. oktober.