Føroysk og grønlendsk umboð kunnu vera avgerandi

Líkt er til, at føroysku og grønlendsku fólkatingsumboðini kunnu vera avgerandi, tá nýggj stjórn skal skipast í Danmark eftir fólkatingsvalið.

Ein meiningakanning, sum Epinion hevur gjørt, vísir, at reyði vongurin í Danmark við Mette Frederiksen á odda hevði fingið 87 umboð, um val var nú.

Neyðugt er við 90 umboðum fyri at fáa meriluta, og tí hevði reyði vongurin havt tørv á atkvøðunum frá trimum av fólkatingslimunum í Føroyum og Grønlandi.

DR skrivar, at Mette Frederiksen, eftir øllum at døma, hevði fingið undirtøku frá trimum av teimum fýra umboðunum úr Føroyum og Grønlandi, um tey somu verða vald, og hevði tí kunnað hildið fram sum forsætisráðharri.

Líkt er til, at tað er sera javnt millum donsku veingirnar, nú ein góð vika er eftir til valið.