Kaðal millum Bretland og Hetland fingið skaða

Undirsjóvarkaðalin millum Stórabretland og Hetland hevur fingið skaða, og fólk í oyggjunum hava mist at kalla alt alt samband við umheimin.

Tað skrivar bretska kringvarpið, BBC.

Løgreglan sigur sambært bretska kringvarpinum, at kaðalin er skorin av.

Eisini í farnu viku fekk sjókaðalin skaða. Ta ferðina var tað kaðalin, sum er millum Føroyar og Hetland. Tann skaðin verður eftir ætlan liðugt umvældur leygardagin.

Alastair Carmichael, ið umboðar Hetland í Undirhúsinum, sigur við BBC, at hann hevur sett seg í samband við stjórnina.

Hon sigur, at tað fara at ganga nakrir dagar, áðrenn sambandið til og úr Hetlandi aftur riggar, skrivar DR.