Størsta búskaparliga afturgongdin í Bretland í nýggjari tíð

Bretar kunnu vænta størstu búskaparligu afturgongd í nýggjari tíð.

Tað ávarar bretski tjóðbankin um, eftir at bankin hækkaði rentuna 0,75 prosentstig. Sostatt er rentan nú trý prosent.

So høg hevur rentan ikki verið síðani 2008, tá ið bretska bankakervið var í vanda fyri at kollsigla.

Bretskt pund

Búskaparlig afturgongd verður í Bretlandi næstu árini. (Mynd: Ritzau Scanpix)

Arbeiðsloysið tvífaldast

Í nýggjari frágreiðing ávarar tjóðbankin um tvey hørð ár við virðislækkingum og arbeiðsloysi, sum kann tvífaldast.

Heitið "búskaparlig afturgongd" verður brúkt til at lýsa støðuna, tá ið ein tjóðarbúskapur minkar tveir ársfjórðingar á rað. Í slíkum førum er vanligt, at fyritøkur tjena minni, lønir minka og arbeiðsloysið veksur. 

Sambært frágreiðingini hjá tjóðbankanum, minkaði búskapurin í summar, og gongdin fer halda fram til fyrsta ársfjórðing í 2024.