ES og USA : Samstarv skal byrgja fyri handilskríggi

- USA og ES eiga saman at gera íløgur í grøna tøkni og byrgja fyri oyðileggjandi handilskríggi.

Tað sigur forkvinnan í ES-nevndini, Ursula von der Leyen.

- Í sambandi við veðurlagsbroytingar og kapping úr Kina, hava USA og ES felags áhugamál um at varðveita ídnaðarligu leiðslu okkara, segði von der Leyen í talu síni á College of Europe í Brugge í Belgia í gjár.

Forkvinnan í ES-nevndini vendi sær beinleiðis til USA, tí ES er stúrið um, at Washington nýliga hevur samtykt at veita amerikonskum brúkarum 700 milliónir dollarar í skattalætta.

Samtyktin veitir m.a. teimum skattafrádrátt, sum keypa el-bil við battaríum, sum eru framleidd í USA ella í ávísum londum, sum hava fríhandilsavtalu við USA.

ES og USA hava umfatandi handilssamstarv, men hava onga avtalu av hesum slagi.

Rakar Evropa

Fleiri bilframleiðarar eru í ES, og óttin í ES er, at amerikanska samtyktin kann raka evropisku framleiðararnar.

Von der Leyen ávarar um, at ES kann seta í gildi tiltøk sum aftursvar til grønu tøknilógina í USA, men hon heldur, at ES og USA heldur eiga at samstarva fyri at loysa málið.

- USA og ES eiga tí í felag at gera íløgur í tvær ídnaðarmiðstøðir fyri grøna orku báðumegin Atlantshav, segði von der Leyen, sum legði aftrat, at so mugu strongu reglurnar fyri almennar íløgur linkast.

Hon segði eisini, at USA og ES eiga at menna samstarvið fyri at fáa atgongd til og framleiða týdningarmiklar rávørur og sostatt skerja fyrimunirnar hjá Kina.