Sjey ára fongsul til Aung San Suu Kiy

Frákoyrdi leiðarin í Myanmar, Aung San Suu Kyi, varð í nátt okkara tíð dømd sjey ára fongsulsrevsing, eftir at ein dómstólur í Myanmar dømdi hana seka í fimm ákærumálum um korrupsjón.

Í rættarmálinum, sum varð hildið fyri afturlætnum hurðum, varð 77 ára gamla Aung San Suu Kyi dømd fyri at hava leigað og brúkt eina tyrlu ólógliga, meðan hon var landsins leiðari.

Síðani desember í fjør hevur Aung San Suu Kyi fingið fongsulsdómar uppá í minsta lagi 26 ár, og nú hevur hon so fingið sjey ár afturat.

Vestanlond hava sagt, at rættarmálini bert hava til endamáls at kyrra og kúga størsta fíggindan hjá hernaðarstýrinum í Myanmar.

Aung San Suu Kyi var leiðari í Myanmar í fimm ár frá 2015, tá tað eydnaðist at koyra hernaðarstýrið í landinum frá, men seinni tók herurin aftur valdið í landinum.

Í 1991 fekk hon friðarheiðursløn Nobels fyri sítt stríð fyri fólkaræði í landinum.