Byggja protein- og lýsiverksmiðju á Tvøroyri

Varðin Pelagic ætlar at byggja eina protein- og lýsiverksmiðju á Tvøroyri, ið skal vera framhald av tí virksemi, felagið síðstu 10 árini hevur havt har.

Tað var á sumri í 2012, at Varðin Pelagic legði til brots á Tvøroyri við at virðisøkja og víðarimenna uppsjóvarfisk í Suðuroynni.

Virkið á Tvøroyri framleiðir sild, makrel, lodnu og svartkjaft, og av hesum fer ein partur til protein og lýsi, og felagið sigur, at ein av fyritreytunum fyri víðarimenning og kappingarføri er ein protein- og lýsiverksmiðja.

Endamálið er at kunna gagnnýta ta góðu restrávøruna frá høvuðsframleiðsluni, samstundis sum virkið ynskir at betur kunna gagnnýta svartkjaftin.

Hetta fer at skapa fleiri størv, støðugt arbeiði og eisini at hava við sær, at farmaflutningurin á Suðuroyðarleiðini minkar munandi, sigur Varðin Pelagic.

Arbeitt hevur verið við ætlanini í longri tíð, og nú er tað komið so mikið langt, at umsókn um byggiloyvi til protein- og lýsiverksmiðjuna í gjár varð handað Tvøroyar kommunu.