Svøríki: Russland breiðir falstíðindi um svensk kjarnorkuvápn

Russiskir miðlar breiða falstíðindi um Svøríki.

Svenski forsætisráðharrin, Ulf Kristersson, sigur greitt nei til kjarnorkuvápn í Svøríki, men russiskir miðlar skriva júst tað øvuta.

Fleiri russiskir miðlar skriva, at Ulf Kristersson tekur undir við at hava kjarnorkuvápn upp á svenskari jørð í friðartíð.

RBC, Gazeta, Lenta, News.ru og Kommersant eru nakrir av russisku miðlunum, sum vilja vera við, at svenski forsætisráðharrin skal hava sagt hetta á árligu trygdarráðstevnuni "Fólk og verja" í Sälen sunnudagin, skrivar norska tv2.

Verður við í nýggjari rakettverju

Sambært svenskum miðlum, segði Kristersson á ráðstevuni, at Svøríki sum Nato-limur verður við í nýggju rakettverjuni hjá verjusamgonguni, og fer at hava eftirlit í luftini yvir londunum við Eystrasalt, og at svenskar deildir skulu verða til reiðar at hjálpa Nato at verja hesi londini.

Í røðuni reksaði Kristersson eisini upp, hvussu stjórnin ætlar, at Svøríki skal hjálpa Nato í verjuni.

Sambært svenska Aftonbladet broytti russiski miðilin RBC í gjárkvøldið greinina, og umbar seg við vánaligari umseting.

Svenska uttanríkisráðið sigur, at sendistovan í Moskva setti seg í samband við heimasíðuna, og heitti á tey um at rætta skeivleikan.