Turkaland havnar svensku umsóknini um NATO-limaskap

- Turkaland fer at góðkenna finsku umsóknina um NATO-limaskap, hóast svenska umsóknin verður havnað.

Tað sigur turkiski forsetin, Recep Tayyip Erdogan, í eini sjónvarpsrøðu fyri turkisku tjóðini.

Fyri at gerast limur krevst, at øll NATO-limalondini taka undir við tí. Svøríki og Finnland søktu í felag um NATO-limaskap stutt eftir russisku innrásina í Ukraina, og londini hava higartil hildið fast um, at tey søkja saman.

- Um tað verður neyðugt, fara vit at geva Finnlandi og Svøríki ymisk svar, sigur hann, og leggur afturat, at tað verður ein skelkur fyri Svøríki, um landið fær annað svar enn Finnland.

Fleiri mótmælistiltøk ímóti Erdogan og Turkalandi hava verið í Svøríki í síðstuni. Og støðan landanna millum er spent.