Virðisgjaldið hækkar ikki fyrr enn 1. september

Meirilutin í fíggjarnevndini, samgongufólkini, mæla til, at virðisgjaldið á hybridbilum og plug-in hybridbilum hækkar 1.september í ár í staðin fyri 1.juli, sum landsstýrið ætlaði.

Virðisgjaldið verður tá tað sama, sum bensinbilar og dieselbilar hava.

Beinir Johannesen í Fólkaflokkinum mælir til ikki at hækka virðisgjaldið á hybridbilum og plug-in hybridbilum.

Magnus Rasmussen í Sambandsflokkinum mælir til, at virðisgjaldið á hybridbilum 1.januar 2024 verður tað sama, sum bensinbilar og dieselbilar hava.

Men virðisgjaldið skal ikki hækka fyri plug-in hybridbilum, sigur Magnus Rasmussen.

Vendir sosialt skeivt

Steffan Klein Poulsen í Miðflokkinum sigur, at uppskotið vendir sosialt skeivt.

Hann mælir til, at bilar, sum hava lægri CIF-gjald enn 350.000 kr., fáa lægri virðisgjald enn 100 prosent árini 2025 til 2028.

Sambært honum skulu persónbilar, sum bara nýta ravmagn ella vetni til framdrift, og sum vera skrásettir í fyrsta, øðrum ella triðja ársfjórðingi í ár, um teir hava eitt CIF-virði, sum er 350.000 kr. ella størri, rinda 30 prosent í virðisgjaldi av avgjaldsskylduga virðinum til og við 100.000 kr. og 45 prosent í virðisgjaldi av avgjaldsskylduga virðinum oman fyri 100.000 kr.