Vilja ikki hava flóttafólk úr jarðskjálvtaraktum økjum

Grikska stjórnin hevur givið boð um at herða trygdareftirlitið við turkiska markið, tí stúrt verður fyri eini aldu av flóttafólki, sum hava mist hús og heim í jarðskjálvtunum 6. februar.

Grikkaland hevur sett fleiri hundrað eftirlitsfólk aftrat við markið, bæði á sjógvi og landi, fyri at steðga streyminum av fólki.

Notis Mitarachi, ráðharri í flóttafólkamálum, sigur, at tað er eingin loysn, at fleiri milliónir flóttafólk koma til Evropa. 

Tí heitir hann á heimsins lond um at senda meiri neyðhjálp til vanlukkuraktu økini, so at sýrar og turkar ikki hava fyri neyðini at flýggja til Evropa.

Fyri løtu síðani frættist aftur um jarðskjálvta har eysturi í Turkalandi. 

Skjálvtin var mátaður til 5,2 á Richterstiganum.