ST ávarar aftur um støðuna í Gasa

Í frágreiðingini frá mannarættindaserfrøðingunum verður víst á, at Ísrael hevur bumbað og oyðilagt stórar partar av landbúnaðinum og fiskivinnuni í Gasa

Ísrael oyðileggur alla matvøruveiting til Gasa og brúkar mat sum vápn í stríðnum móti palestinska fólkinum, siga serfrøðingarnir hjá ST.

Mynd: AFP/Ritzau Scanpix

Jón Svein Heinesen

17.01.2024 - 14:32

Mannarættindaserfrøðingar hjá ST ávara nú aftur um vanlukkuligu støðuna í Gasa.

- Hetta man vera eindømi, at alt sivilfólkið í einum øki er endað hungursneyð so skjótt, sum talan er um her. Ísrael oyðileggur alla matvøruveiting til Gasa og brúkar mat sum vápn í stríðnum móti palestinska fólkinum, siga serfrøðingarnir hjá ST.

Í frágreiðingini verður víst á, at Ísrael hevur bumbað og oyðilagt stórar partar av landbúnaðinum og fiskivinnuni í Gasa, sum hevur givið fólkinum mat í munnin.

Hvørki vatn ella streymur

Flestu bakarí í Gasa eru stongd, tí tey hvørki hava rávøru, vatn ella streym. Og sindrið av neyðhjálp, sum sleppur inn í Gasa, ger lítlan mun. Tað er serliga í norðara parti av Gasa, at sivilfólk hava lítlan ella ongan møguleika at fáa mat ella drekka, men sum heild er støðan sera vánalig í øllum Gaza, siga ST-serfrøðingarnir.

Eisini eru meira enn 60 prosent av bústøðunum hjá sivilfólkinum í Gasa lagdir í oyði, og eisini tað ávirkar møguleikarnar hjá fólki at fáa mat í munnin.