Sólstrálan fyri fyrstu ferð

Tey, sum eru í uppskoti til Ítróttasólstráluna 2023, eru Gyða B. Djónadóttir og Jóhanna Østerø úr Neistanum, Ári Fríðason Jensen frá Borðtennisfelagnum TÓR og Gunnvá Fríða Bárðardóttir Nielsen úr VÍF og Vestmannaliðnum hjá Havnar Fimleikafelag.

Sólstrálan 2023 er ein ungur persónur - 20 ár ella yngri - ið millum annað stimbrar undir rørslu og ítróttagleði og sum leggur lunnar undir tann góða felagsskapin, skrivar ÍSF.

Gyða B. Djónadóttir og Johanna Østerø í Neistanum

Gyða og Johanna eru liðfelagar og spæla hondbólt við gentum 14 ár í Neistanum.

Seinastu tvey kappingarárini hava Gyða og Johanna, sum eru 13 ára gamlar, verið hjálparvenjarar hjá gentunum, sum nú eru 9-10 ár. Tað er eyðsýnt, at genturnar eru sera glaðar fyri sínar hjálparvenjarar, og tær tíma enn betur at venja, tá tær eru har. Gyða og Johanna duga væl at rósa gentunum og fáa tær at kenna seg væl.

Ári Fríðason Jensen í Borðtennisfelagnum Tór

Hóast hann bert er 19 ára gamal, er Ári Fríðason Jensen longu ein av ímyndunum av borðtennisfelagnum TÓR í Tórshavn.

Á fyrimyndarligan og búnan hátt hevur tann tikið við ábyrgdini sum ungdómsvenjari í borðtennisfelagnum Tór, og hann loysir venjarauppgávuna til UG. Við sínum spakføra og jaliga lyndi hugtekur hann ungu leikararnar, samstundis sum hann kortini megnar at vísa myndugleika sum venjari.

Gunnvá Fríða Bárðardóttir Nielsen, VÍF og HF

Gunnvá Fríða Bárðardóttir Nielsen er ein sonn fyrimynd fyri ungdómin í Vestmanna. Hon er jalig, savnandi og full av orku. Gunnvá er 18 ára gomul og spælir bæði á besta liðnum, 1. deild og Gentur 18 hjá VÍF, har hon við sínum lætta lyndi og vinnaravilja hevur hon góða ávirkan á liðið.

Sama jaliga lyndi vísir seg í fimleikinum, har hon íðkar við Vestmannaliðnum hjá Havnar Fimleikarafelag. Har er hon venjari, ber Merkið og hevur í fleiri ár staðið fyri eitt nú tónleikinum til framsýningar.

Ítróttasólstrálan 2023 er ein av teimum sjey heiðurslønunum, ið verða latnar á Ítróttafagnaðinum, sum verður í Løkshøll leygarkvøldið 10. februar 2024.