Uppskot um færri næmingar í flokkinum fær av at vita

Kommunufelagið ivast stórliga í, um neyðugt er at broyta fólkaskúlalógina fyri at røkka einum politiskum máli um, at fleiri vaksin skulu vera um skúlabørnini. 

Sannlíkt kann sama endamál røkkast við at tillaga landsins játtanarskipan til fólkaskúlan. 

Landið kann sostatt raðfesta, at tað til dømis skal vera játtan til ein lærara fyri hvørjar 20 næmingar. 

Um ikki játtan er í fíggjarlógini til ein lærara fyri hvørjar 20 næmingar, so kann tað gera tað sama, hvat stendur í fólkaskúlalógini.

Fær av at vita

Uppskotið hjá Barna- og útbúgvingarmálaráðnum um at hava í mesta lagi 20 næmingar í hvørjum flokki í fólkaskúlanum fær av at vita frá Kommunufelagnum í drúgvum hoyringarskrivi.

Felagið sigur, at tað, sum landsstýrið skjýtur upp, er ikki í samsvari við endamálið, sum uppskotið sambært viðmerkingunum hevur. 

Uppskotið kann gera størri skaða enn gagn, sigur Kommunufelagið.

Áðrenn uppskotið verður lagt fyri tingið, eigur landsstýri at tryggja, at samsvar er millum endamál og lógartekst. 

Kommunufelagið

Kommunufelagið hevur skrivað hoyringarskriv um uppskotið hjá landsstýrinum at hava í mesta lagi 20 næmingar í flokkinum í fólkaskúlanum. (Savnsmynd)

Íløgur í eldraøkið

Kommunufelagið sigur, at alt bendir á, at kommunurnar komandi nógvu árini skulu leggja størsta partin av íløguorku síni í eldraøkið og kommunalu heilsutænasturnar. 

- Hetta uppskotið kann bera í sær, at kommunurnar mugu flyta íløgurnar frá eldraøkinum við stórum og aktuellum tørvi til eitt skúlaøki við avmarkaðum framtíðartørvi, sigur Kommunufelagið.