38 túsund máltíðir úr einum flogfari niðuryvir Gaza

USA kastaði í gjár 66 stórar pakkar við 38 túsund máltíðum úr einum flogfari niður yvir Gaza í gjár.

Amerikanska verjumálaráðið hevur lagt eitt sjónband út av hendingini, sum fór fram í samstarvi við jordanska flogvápnið. Jordan hevur áður hjálpt Sórabretlandi og Fraklandi við hesum sama.

USA kom við neyðhjálpini úr luftini bert ein dag eftir, at amerikanski forsetin, Joe Biden, hevði boðað frá, at aðrir hættir máttu finnast at fáa neyðhjálp inn í Gaza.

Á einum tíðindafundi fríggjadagin segði Joe Biden, at hjálpin til Gaza ikki er nøktandi.

Fyrr í vikuni doyðu fleiri enn 100 palestinar, tá ST royndi at koyra neyðhjálp inn í Gaza við lastbilum. 

Amerikanska verjumálaráðið sigur, at tey arbeiða við at leggja til rættis fleiri tiltøk, har tey veita neyðhjálp til Gaza úr luftini.

Eisini Kanada hevur boðað frá, at tey ætla sær at veita Gaza neyðhjálp úr luftini.

Í minsta lagi 576 túsund fólk í Gaza-geiranum eru sambært ST í vanda fyri fyri at svølta. Hetta svarar til ein fjóðring av øllum íbúgvunum í Gaza. Samstundis gerst tað alsamt torførari at fáa neyðhjálp inn í Gaza.