Nógvar kommunur lúka verri enn so ásettu krøvini um spillvatnsskipanir

Býrt tú í Skálavíkar, Sumbiar, Hovs, Fámjins, Skúvoyar, Hvannasunds, Skopunar, Eiðis ella Sjóvar kommunu, so kanst tú gleðast. Tí so býrt tú í einari kommunu, sum er komin á mál við spillvatnsskipanini, sum samsvarar við kunngerðina um spillvatn frá 2009.

Tað er bara tað, at tað eru minni enn 10 prosent av Føroya fólki, sum tilsamans búgva í hesum kommunum.

Allar hinar 20 kommunurnar, har fleiri enn 90 prosent av okkum búgva, eru framvegis ikki komnar á mál við spillivatnsætlanunum, sum talvan niðanfyri vísir. 

Spillivatnsskipanir, Tíðarlinja, Kommunur

Næstan 10 ár yvir tíðarætlanina

Kunngerðin um spillvatn frá 2009 gav annars kommununum hálvtsætta ár at fáa spillvatnsviðurskiftini í rættlag. Tað vil siga, at komið skuldi verið á mál við spillvatnsætlanunum 1. januar 2015.

Men nú vit skriva mars 2024, eru 20 kommunur framvegis ikki komnar á mál. 

"Spillvatnsskipanir er nakað, ið kommunurnar ikki tykjast vilja raðfesta," sigur  Rakul Mortensen frá Umhvørvisstovuni.

Sambært kunngerðini, skal spillvatn ikki leiðast út í løkir, áir, veitir, vøtn, strond, fjøru og tílíkt. Harafturímóti skal tað leiðast út á sjógv, har rákið førir spillvatnið frá landi, og har vatnskiftið er so stórt, at útleiðingar ikki elva til uppsavning av evnum og tilfari, ella til aðrar broytingar í umhvørvinum.

Dálking sæst í Havn

Kanningar, sum vóru almannakunngjørdar í síðstu viku, staðfestu, at dálking frá spillvatni sæst ymsastaðni í Havn, sum er ein av kommununum, ið enn ikki lýkur treytirnar um spillvatn.

Og nær Tórshavnar kommuna verður liðug við sínar spillivatnsætlanir, vita tey í løtuni ikki. Tað hevur Tórshavnar kommunan upplýst fyri Umhvørvisstovuni.

Sama er við Vága kommunu. Tey vita heldur ikki.

Nakrar kommunur komnar langt

Næstu árini fara fleiri kommunur væntandi at fáa spillivatnsviðurskiftini í rættlag, sum talvan niðanfyri vísir. 

Spillivatnsskipanir, Kommunur, spillivatnsætlanir

Fuglafjarðar kommuna væntar at vera liðug næsta ár. Viðareiðis kommuna í 2026, og Porkeris, Kunoyar og Sørvágs kommuna í 2027.

Í keðiliga endanum koma Nes, Húsavíkar, Hvalbiar og Tvøroyar kommuna, sum vænta at kunna lúka treytirnar um spillvatn í 2030, Kvívíkar og Vágs kommuna í 2031, og longst fer tað at taka Klaksvíkar kommunu. Har hava tey upplýst fyri Umhvørvisstovuni, at tey koma á mál í 2034. 

Tað hoyrir tó við til søguna, at Klaksvíkar kommuna ger eitt nógv meira umfatandi arbeiði enn aðrar kommunur við at framtíðartryggja spillvatnsskipanina, vísir Umhvørvisstovan á.

Kommunan kann tó ikki snúgva sær undan, at í 2034 eru tað 19 ár ov seint, og tá eru 25 ár síðani, at kommunurnar fingu at vita, hvussu og nær spillvatnsviðurskiftini skulu vera í lagi.