Álopið á konserthúsið: Trý fólk handtikin aftrat

Trý fólk aftrat eru handtikin fyri at hava verið við í yvirgangsálopinum á konserthúsið Crocus í útryðjuni av Moskva. 

Tað skrivaði russiska tíðindastovan Interfax í gjár.

Russiska trygdartænastan, FSB, handtók fólkini. Tvey av teimum handtiknu eru útlendskir ríkisborgarar, og ein er russari.

Tey skulu, sambært trygdartænastuni, hava verið við til at fíggja og útvega fólk til at fremja yvirgangsálopið, har 144 fólk lótu lív og 550 vóru særd.

Frammanundan eru átta menn handtiknir í sambandi við yvirgangsálopið. Fýra teirra eru ákærdir fyri at hava framt sjálvt álopið. 

Harumframt skulu myndugleikar í Tadsjikistan hava handtikið níggju fólk í sambandi við álopið.