Portugal: Gomul hjálond fáa einki endurgjald

Portugisiski forsetin Marcelo Rebelo de Sousa hevur í fleiri førum nevnt møguleikan fyri at geva fyrrverandi portugisiskum hjálondum endurgjald fyri, at Portugal tók fólk úr sínum hjálondum sum trælir.

Men nývalda stjórnin í Portugal hevur ongar ætlanir um at geva gomlu portugisisku hjálondunum nakað slag av endurgjaldi.

Tað skrivar Reuters.

Sosialdemokratiski forsetin Rebelo de Sousa hevur millum annað sagt, at gomlu hjálondini kunnu fáa búskaparligan stuðul ella fáa skuld eftirgivna sum eitt endurgjald fyri, at Portugal rændi fólk úr hesum londunum, men nývalda høgravenda stjórnin sigur seg ikki vera sinnaða at veita nakað endurgjald.

Mett verður, at Portugal frá 1400-talinum fram til 1800-talið flutti góðar 5,8 milliónir afrikanarar vestur um hav og gjørdi tey til trælir í Brasil.

Brasil var størsta hjálandið hjá Portugal, sum eisini hevði hjálond í Afrika og Asia.