Elveiting viðgjørd uttan álit

Tingskipanin loyvir tingfólkum at krevja mál aftur úr nevnd, uttan at nevndin hevur skrivað álit um málið.

Í tingskipanini stendur, at er álit ikki komið, tá freistin er farin, er tingfólki heimilað at krevja, at formaðurin setir spurningin til atkvøðugreiðslu, um tingviðgerðin skal halda fram, hóast einki álit er latið.

Og tað var júst tað, Eyðgunn Samuelsen gjørdi í gjár um uppskotið um elveitingarlógina.

Løgtingið atkvøddi fyri, at málið verður viðgjørt, hóast álit ikki er skrivað.

Ingilín D. Strøm, landsstýriskvinna, kom í løgtingið við uppskotinum 7. mars.

Rættarnevndin fekk málið 11. apríl eftir fyrstu viðgerð.

Álitið skuldi koma haðani í seinasta lagi 11. mai.

Men einki álit kom.

Onnur viðgerð um elveitingarlógina verður í dag.