Ahmadinejad vil vera forseti aftur

Í Iran roynir fyrrverandi forsetin Mahmoud Ahmadinejad seg enn einaferð sum forsetavalevni.

Tað boðar iranskt ríkissjónvarp frá, sambært Reuters og danska kringvarpinum.

Ahmadinejad er rættiliga umstríddur í Iran, men hevur altso bjóðað seg til at verða forseti enn einaferð.

Ahmadinejad sat sum forseti frá 2005 til 2013.

Hann hevur millum annað sett spurnartekin við Holocaust, og so er hann eisini maðurin aftan fyri nógv umstrídda moralpolitiið, sum helt vakt á gøtunum í Iran frá 2006 til 2022.

Tað er ikki fyrstu ferð, at Ahmadinejad bjóðar seg fram sum forsetavalevni, síðan hann fór frá í 2013. Tað hevur hann gjørt fleiri ferðir, uttan at tað hevur eydnast honum. Seinast var í 2021, tá Vaktarráðið vísti honum burtur. Eisini hesa ferð er upp til ráðið, um Ahmadinejad verður góðkendur at føra forsetavalstríð í Iran.

Endaligi listin við valevnum verður kunngjørdur 11. juni.