Teldusníkar leggja bretsk sjúkrahús lamin

Fleiri sjúkrahús í London eru síðstu vikuna álopin av teldusníkum, sum hava lagt partar av virkseminum at kalla lamið.

Telduálopið ger tað munandi truplari hjá sjúkrahúsunum at finna røttu blóðflokkarnar til sjúklingar, sum antin skulu hava blóðflutning - blóðtransfusión - ella skulu leggjast undir skurð, og tí hava tørv á blóði.

Støðan hevur gjørt, at sjúkrahúsini síðstu dagarnar hava verið noydd at avlýsa nógvar skurðviðgerðir.

Í dag heitir bretska heilsuverkið á fólk um at lata blóð. Tørvur er á blóðgevum, tí sjúkrahúsini hava ilt við at finna rætta blóðið fram.

Sambært BBC verður gitt, at talan er um eitt russiskt lið av teldusníkum, ið hevur framt álopið á sjúkrahúsini í London.