Zelenskyj: Kina kann hjálpa Ukraina

Kina var ikki á stóra Ukraina-toppfundinum í Sveis um vikuskiftið. 

Ukrainski forsetin leggur dent á, at Kina er ikki fíggindi hjá Ukraina.

- Kina kann hjálpa okkum. Ukraina hevur ongantíð sagt, at Kina er fíggindi okkara, segði Volodymyr Zelenskyj við fjølmiðlar eftir fundin í Sveis um vikuskiftið.

Fleiri enn 90 lond vóru umboðað á fundinum, men Kina var ikki við.

Toppfundur um Ukraina í Sveis

Zelenskyj, forseti, heitti á toppfundinum í Sveis á Kina, um heldur at samskifta um síni friðaruppskot beinleiðis við Ukraina, enn at leggja tey út á sosialar miðlar. (Mynd: Reuters/Ritzau Scanpix)

Samhandilin nógv vaksin

Kina hevur tvíhildið um, at tað er uttanveltað í Ukraina-krígnum. 

Men handilin millum Kina og Russland er vaksin nógv, síðani Putin gjørdi innrás í Ukraina, og tøtt bond eru framvegis millum forsetarnar í báðum londunum.

Zelenskyj heitti í røðu síni eisini á Kina, um heldur at samskifta um síni friðaruppskot beinleiðis við Ukraina, enn at leggja tey út á sosialar miðlar. 

Ukrainski forsetin mælti eisini til uppfylgjandi fund eftir toppfundin um vikuskiftið.