Norðurkorea lovar Russlandi fullan stuðul í krígnum í Ukraina

Russiski forsetin Vladimir Putin og norðurkoreiski leiðarin Kim Jong-un hava skrivað undir umfatandi strategiska samstarvsavtalu. 

Tað skrivar almenna russiska tíðindastovan Interfax, sambært Reuters.

Smálutirnir í avtaluni eru ikki almennir enn, men Kim Jong-un lovar Russlandi fullan stuðul í russiska krígnum í Ukraina, skrivar almenni russiski miðilin.

Avtalan var undirskrivað, eftir at leiðararnir vóru einsamallir á fundi, sum vardi í góðar tveir tímar. 

Les her: Nato stúrir fyri russiskum stuðli til Norðurkorea

Fyrrverandi tíðindamaðurin hjá svenska kringvarpinum í Russlandi, Bert Sundstrøm, heldur, at tað er at gera ov nógv av at stúra fyri samstarvinum millum Russland og Norðurkorea.

- Vit vita, at Norðurkorea sendir Russlandi vápn. Men í roynd og veru hevur hetta ongan strategiskan týdning, tí Norðurkorea hevur ikki nógv at bjóða, annað enn elligamlar granatir og rakettir. Og tað broytir einki. Strategiskt er tað kanska so, at russisk tøkni kann skunda undir kjarnorkuætlaninar hjá Norðurkorea. Tað er ørkymlandi, men er ikki akutt í løtuni, sigur Bert Sundstrøm við svenska kringvarpið.