Hesi mynda nýggju leiðsluna í ES

Stutt fyri midnátt í gjárkvøldið samdust ES-londini um at tilnevna Ursulu von der Leyen til forkvinnu í ES-nevndini í nýtt fimm ára skeið. Hetta er hægsta starv í ES yvirhøvur.

Fyrrverandi portugisiski forsætisráðharrin António Costa verður nýggjur formaður í Evropiska ráðnum. 

Og estiski forsætisráðharrin, Kaja Kallas, verður nýggjur uttanríkisleiðari í ES.

Semja um hetta fekst ikki fyrr enn seint í gjárkvøldið.

Meloni misnøgd

Spenningur var um avgerðina, serliga tí italski forsætisráðharrin, Georgia Meloni, var sera misnøgd, tí hon ikki hevði verið við í tilgongdini at manna leiðsluna í ES.

Tá tað hendi, sótu bara seks ES-leiðarar í fundarhølinum, m.a. Emmanuel Macron fyri Frakland, og Olaf Scholz fyri Týskland.

Tey seks umboðini mynda tær tríggjar samgongurnar, sum saman hava meirilutan í ES-tinginum: kristindemokratarnar EPP, sosialdemokratiska S&D og liberala Renew.