SNP fær væntandi vánaligt valúrslit

Skotski tjóðskaparflokkurin SNP fær væntandi eitt vánaligt parlamentsval - helst tað vánaligasta síðani 2010, vísa veljarakanningar á sjálvur valdegnum.

Sambært kanningini fer flokkurin úr 43 sessum niður í 10.

Nógvur ófriður hevur verið í SNP, sum hevur skift formann tvær ferðir í minni enn eitt ár. Fíggjarlig viðurskifti eru kannað hjá flokkinum, og SNP hevur verið í tvíningum í fleiri politiskum málum,  eitt nú í spurninginum um at fáa nýggja fólkaatkvøðu um loysing.

Hevur verið væl umboðaður

SNP hevur verið ein av stóru flokkunum í bretska parlamentinum síðani 2015. 

Hann hevur fingið stuðul frá veljarum, sum vilja hava loysing, í kjalarvørrinum á fólkaatkvøðuni í 2014, tá ið 55 prosent av skotum atkvøddu fyri at vera verandi undir bretskum valdi.

Hóast úrslitið á fólkaatkvøðuni ikki gjørdist, sum SNP hevði æltað, sameindust fleiri, sum vildu hava loysing, í flokkinum. 

Í 2015, 2017 og 2019 gjørdist SNP triðstørsti flokkur í bretska parlamentinum, hóast hann bara hevði valevni til 10 prosent av sessunum í parlamentinum.