Vinstravongurin vann valið í Fraklandi

Franska tjóðartingsvalið endaði ikki heilt sum væntað.

Veljarakanningarnar og fyrsta valumfar spáddu til høgraflokkarnar, men tað eru vinstraflokkarnir, sum í dag, dagin eftir valið, standa eftir við størsta sigrinum.

Enn er kortini óvist, hvat valúrslitið hevur at siga. 

Tó er heilt vist, at ongin flokkur hevur fingið avgjørdan meiriluta í tjóðartinginum. Tað vil siga minst 289 av teimum 577 sessunum í tinginum.

Tað hevur við sær, at samráðast má um politiska samgongu.

Jean-Luc Melanchon

Jean-Luc Melenchon er leiðari í fylkingini á vinstraveingi, sum fekk flestar atkvøður. (Mynd: AFP/Ritzau Scanpix)

Marine Le Pen

Tjoðskaparligi savningarflokkurin hjá Marine Le Pen á høgraveingi fekk ikki ta undirtøkuna, sum spátt var undan seinna valumfari í gjár. (Mynd: Reuters/Ritza Scanpix)

Forsætisráðharrin leggur frá sær

Hendan gongdin byrjar við, at Emanuel Macron, forseti, vísir á ein nýggjan forsætisráðharra, sum fær ábyrgdina av at standa á odda fyri  samgongusamráðingunum.

Í Fraklandi er siðvenja, at forsætisráðharrin leggur frá sær eftir eitt val, hóast hetta ikki er eitt krav.

Og Gabriel Attal segði í røðu í gjárkvøldið, at hann í dag fer at biðja Emanuel Macron um loysa seg úr forsætisráðharrasessinum.

Síðani hevur hann tó eisini sagt, at hann veit, at valúrslitið hevur elvt til, at nógv eru farin at stúra um framtíðina í Fraklandi. 

- Land okkara er í eini heilt óvanligari støðu, samstundis sum vit um nakrar fáar vikur skulu bjóða heiminum vælkomnum til olympisku leikirnar. Tí sigi eg ikki forsætisráðharrasessin frá mær, so leingi sum tað er neyðugt, sigur Atal sambært The Guardian.