Føroysku telvararnir fingu góða byrjan á talvolympiaduni

Føroyska talvlandsliðið byrjaði í gjár væl á talvolympiaduni, sum er í Budapest.

Fyrsti dysturin endaði við 3-1 sigri á karibisku oynni Santa Lucia, sum bara fyri aðru ferð er við á talvolympiadu.

Høgni Egilstoft Nielsen, Rógvi Egilstoft og Luitjen Akselsson Apol vunnu síni talv, men heldur óvæntað tapti Helgi Dam Ziska á fyrsta borði.

Í dag er mótstøðan ein heilt onnur, tí Føroyar telva ímóti Turkalandi, sum er styrkismett sum nummar 14 í kappingini, og hevur stórmeistarar á øllum borðum.