Mette Frederiksen: Ukraina eigur at sleppa at brúka vápn inni í Russlandi

- Fleiri lond eiga at gera sum Danmark og geva Ukraina heimild til at brúka vápn, sum landið hevur fingið, til at leypa á í Russlandi. 

Tað sigur danski forsætisráðharrin Mette Frederiksen í samrøðu við Bloomberg.

- Uppskotið hjá mær er, at vit gevast at kjakast um reyðar strikur. Týdningarmestan strikan fór longu, tá ið russarar gjørdu innrás í Ukraina, sigur danski forsætisráðharrin við Bloomberg.

F16-flogfør

Danmark hevur givið Ukraina loyvi at brúka donsu F16-stríðsflogførini í álopum á Russland, men onnur lond aftra seg við at gera tað sama við vápnini, sum tey hava latið ukrainskum herdeildum.

Serliga hevur USA sett avmarkingar fyri, hvussu vápnini, sum tað hevur latið, kunnu brúkast, av ótta fyri at landið verður drigið longri inn í eina ósemju við Russland.

Mette Frederiksen sigur, at sameind hjá Ukraina hava givið Russlandi alt ov góð kort í hondina við at avmarka nýtsluna av vápnum, sum sameind hava givið Ukraina.

- Eg hevði ongantíð latið nakran í Russlandi avgjørt, hvat er rætt at gera í Nato, í Evropa ella í Ukraina, sigur Mette Frederiksen við Bloomberg.