Ódnarveður og nógvur kavi ávirkar Altingsvalið í Íslandi

Altingsval er í Íslandi í dag, og orsøkin til valið í dag er, at samgongan hjá Bjarna Benediktsson, forsætisráðharra, legði frá sær miðskeiðis í oktober, sum avleiðing av innanhýsis stríði.

Fyrstu valhølini lótu upp klokkan níggju í morgun lokala tíð, og lata aftur klokkan tíggju í kvøld. 

Men vegna ódnarveður og nógvan kava - serliga í eysturlandinum, so bleiv boðað frá frammanundan, at valið kundi útsetast, verður veðrið ov keðiligt.

Landsnevndin í Íslandi hevur latið avgerðina út til økisvalnevndirnar at taka avger um, at valið kann útsetast summastaðni, og tað er ikki fallið í góða jørð hjá øllum.

ES kann aftur koma upp á tal
Veljarakanningar fyrr í mánaðinum vístu, at Sosialdemokratarnir fór at fáa bestu undirtøku við 22 prosentum. Næststørstur var høgravenda liberala Viðreisn, sum hevur klintrað spakuliga uppeftir í veljarakanningum.

Hesir báðir flokkar eru fyri ES-limaskapi, og gitingar eru um, hvørt valið fer at elva til eitt nýtt ES-kjak í Íslandi, nú hækkandi prísir, høgar rentur og aðrar búskaparligar avbjóðingar hava elvt til ónøgd við verandi stjórn í Íslandi.