Nógvir veikleikar í lógaruppskoti

Ófráboðaðir fyrispurningar til landsstýrisfólk og løgmann eru á dagsskránni hjá løgtinginum í dag.

Annars eru seks triðju viðgerðir og eisini seks aðru viðgerðir, so 12 atkvøðugreiðslur vera í tinginum í dag.

Millum annað skal tingið atkvøða um lógaruppskotið um tillagað starv.

Meirilutin í trivnaðarnevndini, nevndarlimirnir hjá andstøðuni, mæla frá at samtykkja uppskotið hjá landsstýrinum.

Meirilutin heldur, at høvdu hoyringar verið, var hetta málið als ikki komið í løgtingið, tí øll, sum eru hoyrd, eru í móti tí.

Nógvir veikleikar eru í uppskotinum, sigur meirilutin. Hann nevnir sjey veikleikar.

Millum annað vera færri á arbeiðsmarkaðinum, og sparing verður eingin. 

Samgonguumboðini í nevndini mæla til at samtykkja uppskotið.

Tey heita á landsstýriskvinnuna í almannamálum um saman við pørtunum á arbeiðsmarknaðinum at eftirmeta skipanina og kanna, hvørjar tillagingar eiga at vera gjørdar fyri at framtíðartryggja skipanina.

Trivnaðarnevndin viðgjørdi uppskotið á seks fundum.