Kunnu fiska alla sildakvotuna í norskum sjógvi

Føroyar og Noreg hava í dag skrivað undir strandarlandasemju um at býta norðhavssild.

Dennis Holm, landsstýrismaður, góðkendi semjuna eftir ráðførslu í Løgtingsins uttanlandsnevnd.

Sambært semjuni fáa Føroyar 10 prosent av mest loyvdu veiðu (MLV) og Noreg  64,18 prosent av MLV.

Taka felags ábyrgd

Við hesum taka Føroyar og Noreg í felag ábyrgd til tess at minka trýstið á norðhavssildastovnin og virka í felag fyri at tryggja, at norðhavssildastovnurin verður umsitin á burðardyggan hátt í framtíðini, sigur Dennis Holm, landsstýrismaður í fiskivinnumálum, í tíðindaskrivi.  Tilsamans hava Føroyar og Noreg saman minkað ovfiskiskapin 22,82 prosentstig 

Aftrat strandarlandasemjuni hava Føroyar og Noreg gjørt semju um, at føroysk skip kunnu fiska alla føroysku norðhavssildakvotuna í norskum sjógvi, meðan norsk skip sleppa at fiska 17,5 prosent av mest loyvdu veiðu av svartkjafti í føroyskum sjógvi. 

Dennis Holm

Dennis Holm, landsstýrismaður í fiskivinnumálum. 

Góð 40.000 tons

Føroyska kvotan av norðhavssild í 2025 verður sambært strandarlandasemjuni 40.179 tons.

Dennis Holm, landsstýrismaður, sigur, at strandarlandasemjan millum Føroyar og Noreg hevur stóran týdning bæði fyri føroyska uppsjóvarflotan og fyri norðhavssildastovnin. Føroysk skip kunnu nú fiska alla føroysku sildakvotuna í norskum sjógvi og er hetta ein týðandi tryggleiki, tá hugsað verður um ferðingarmynstrið hjá stovninum, sigur hann. 

Strandalandarsemjan kann lesast her.

Semjan um atgongd kann lesast her.