Tráfylging og sálarligur harðskapur í revsilógina

Nakrar broytingar í revsilógini eru á veg.

Uppskot um tær er sent til hoyringar. 

Ætlanin er at fáa í revsilógina ásetingar um tráfylging, stalking, og sálarligan harðskap.

Og nýggj áseting um ágang móti alment settum starvsfólki skal í revsilógina.

Í galdandi revsilóg er eingin sjálvstøðug áseting um tráfylging og heldur ikki um sálarligan harðskap.

Ein áseting er eisini um at herða revsingina fyri endurtiknan einfaldan, vanligan, harðskap í tøttum sambondum.

Á heysti 2023 kom ein dagførd heildarætlan um harðskap í parlagi og nærsambondum. 

Heildarætlanin mælir til at kriminalisera sálarligan harðskap og tráfylging.

Lógin um boð um frástøðu skal eisini broytast, so hon eisini umfatar sálarligan harðskap.

Tað er, at tá grundaður illgruni er um sálarligan harðskap, skal tann, sum er undir illgruna, ikki hava samband við tann, sum harðskapurin skal vera framdur móti.