Kina og USA ósamd um upprunan til Covid 19-virus

Kina vísir aftur, at Covid-19-virusið stavar frá eini rannsóknarstovu í Kina.

- Tað er sera ósannlíkt, at virusið stavar frá eini rannsóknarstovu, sigur Kina í aftursvari.

Amerikanska fregnartænasta CIA boðaði um vikuskiftið frá, at tað er meira sannlíkt, at Covid-19-virusið er sloppið úr eini rannsóknarstovu í Kina, enn at djór hava borið smittuna til menniskju.

CIA kunngjørdi niðurstøðuna leygardagin, stutt eftir at kunngjørt var, at John Ratcliffe tekur við leiðsluni í fregnartænastuni, eftir at Donald Trump aftur gjørdist forseti. 

Í fráboðanini hjá CIA verður gjørt vart við, at støðan tó er tikin við fyrivarni. Báðir partar í málinum skuldu framvegis kannast.

Talskvinnan fyri uttanríkisráðið í Kina, Mao Ning, vísir í dag á, at eitt felags toymi av serfrøðingum úr Kina og heimsheilsustovninum WHO hevur kannað rannsóknarstovur í býnum Wuhan í Kina. 

Niðurstøðan hjá teimum var, at eingin ábending var um, at virusið stavar frá eini rannsóknarstovu. 

Gevast við at sáa iva

Mao Ning heitti á amerikanskar myndugleikar um at gevast við at sáa iva um upprunan hjá virusinum á politiskan hátt.

Tíðliga í 2021 fór eitt toymi av serfrøðingum hjá WHO til Kina og kannaði upprunan til virusið saman við kinesiskum vísindafólkum. 

Í felags frágreiðing varð mett, at tað var mest sannlíkt, at flogmýs høvdu borið virusið til menniskju, møguliga á einum marknaði.

 Síðani hevur WHO ikki fingið loyvi at senda serfrøðingar til Kina, hóast fleiri ferðir at hava biðið um tað.

Um vikuskiftið segði John Ratcliffe, at raðfest er at finna útav upprunanum til farsóttina. 

Hann staðfesti eisini sína fatan av, at virusið kann knýtast til ein virusfrøðiligan stovn í kinesiska býnum Wuhan.

Fyrstu tilburðirnir av COVID-19 vóru staðfestir í býnum, og flogmýsnar, sum verða hildnar at hava verið orsøkin, halda til einar 1.600 kilometrar frá býnum.