Trump tosar aftur um at fáa valdið í Grønlandi

Amerikanski forsetin, Donald Trump, væntar, at tað fer at eydnast USA at fáa vald í Grønlandi.

Tað segði hann í røðu síni fyri kongressini í nátt, okkara tíð.

- Eg vænti, at tað endar við, at vit fáa tað. Onkursvegna fáa vit tað, segði Trump:

Hann endurtók boðskapin um, at USA hevur brúk fyri Grønlandi í sambandi við trygd og altjóða trygd.

- Vit stuðla viljanum hjá grønlendingum um sjálvi at avgera tykkara framtíð. Velja tit tað, so bjóði eg tykkum vælkomnum sum part av USA, segði Trump.

Sí videobrot frá AP-tíðindastovuni:

Meiri revsitollur

Røðan hjá Trump í kongressini vardi í ein tíma og 35 minuttir. 

Trump boðaði frá, at hann 2. apríl fer at leggja revsitoll á øll, sum leggja toll á amerikanskar vørur. 

Hann nevndi eisini, at hann ætlar at taka Panamaveitina aftur.

Trump segði, at hann hevði fingið bræv frá ukrainska forsetanum, Volodymyr Zelenskyj, sum eftir øllum at døma, sambært Trump, er til reiðar at skriva undir avtaluna og ráevni. 

- Eg arbeiði fyri at steðga krígnum, segði Donald Trump.