Felag hjá LÍV hevði 214 mió. kr. í avkasti í fjør

Partafelagið, sum vanliga verður rópt LÍV 3, hevði 214 mió.kr. í avkasti av sínum íløgum í fjør.   

Felagið hevur íløguognir fyri slakar tvær milliardir krónur.

Úrslitið í fjør var 126,4 mió.kr. eftir skatt. 

Eitt avtøkufelag

LÍV 3 er eitt avtøkufelag, sum ikki stovnar nýggjar eftirlønaravtalur. 

Felagið hevur tryggingaravtalur við veitingartrygd, sum landsstýrið veðheldur fyri.

Inngjøldini fyri verandi tryggingaravtalur vóru 37,3 mió.kr. í fjør.

Veitingarskyldan hjá felagnum ger, at móðurfelagið hevur negativa eginogn, sum er 480 mió.kr. 

Finn Danberg heldur fram

LÍV 3 hevði aðalfund 30. apríl.

Finn Danberg heldur fram sum nevndarformaður, Gunnleyg Árnafjall heldur fram sum næstforkvinna og Kári Petersen og Árni Arge eru nevndarlimir. 

Tey eru øll afturvald.

Høgni Olsen stillaði ikki uppaftur á nevndarvalinum.

Fyri hann var valdur Árni Ellefsen.