Julian tók 32 ára gamalt met: - Eitt stórt stig hjá mær

 - Hetta var eitt stórt stig hjá mær.

Tað sigur Julian Gregersen, sum í gjár tók 32 ára gamla metið hjá Albert Marna Joensen í 5 kilometur renning á landavegi. 

Hann kappaðist í ensku kappingini Dashing Deer 5K í London og kom á mál við tíðini 15:05 minuttir; heili 19 sekund skjótari enn gamla metið frá 1993.

 - Tað kennist gott at taka hetta gamla metið. Tað var ein teinur, har eg kom í eina góða rútmu og rann einsamallur fyri tað mesta, sigur Julian Gregersen úr Treysti.

 - Hetta var avgjørt eitt mál, eg hevði sett mær frammanundan. Eg havi prøva eftir tí fyrr, so tað var stuttligt at síggja, at venjingin síðani hevur givið úrslit.

Ætlar sær undir 15 minuttir

Kappingin í London var fyrra kappingin av tveimum hjá Juliani Gregersen undan Oyggjaleikunum á Orknoyggjum, sum vera miðskeiðis í juli.

Leiðin gongur nú til Danmarkar, har langteinarennarin skal kappast um danska meistaraheitið í 5 kilometrum. Nýggja málið er skava minst seks sekund av tíðini afturat.

 - Nú eg var so tætt við 15 minuttir, er málið at koma undir 15 minuttir, sigur rennarin, sum nú tykist hótta fleiri av føroysku metunum frá nítiárunum.

 - Fleiri av langteinametunum eru gomul, so tað ger tað eitt sindur meir motiverandi at fara eftir. Eg fari at taka eitt stig í senn, sigur Julian Gregersen.

Tað er ikki bara Julian Gregersen, sum ger vart við seg á longru renniteinunum fyri tíðina. Eisini Rógvi Kárason og Neli Heldarskarð úr Bragdinum eru væl fyri í løtuni. Allir tríggir skulu kappast á Oyggjaleikunum í Orknoyggjum.