Skjótasti føroyingurin í Guernsey ikki við hesa ferð

Løtan taldist millum tær bestu á seinastu oyggjaleikunum.

Eiri Jógvansson Glerfoss streyk undan mótstøðumonnunum og vann 100 metur renningina í Guernsey. Ein føroyingur var skjótasti maður á oyggjaleikum. Harafturat fór hann avstað við fyrsta plássinum í longdarlopi.

Tíverri ber ikki til hjá unga havnarmanninum at verja gullið, nú oyggjaleikir eru í Orknoyggjum, tí hann er skaddur í hælsinunum.

 - Eg hevði eina vón og ein dreym um at verja gullmedaljurnar, sigur Eiri Jogvansson Glerfoss.

 - Hóast tað ikki ber til, velji eg at síggja tað í síni heild og sum lið í at sleppa ordiliga av við mín skaða, sigur sprintarin.

Steðg frá kappingum

Eiri Jógvansson Glerfoss hevur drigist við sama skaða í eini trý ár. Hann hevur roynt at lagt venjingar soleiðis til rættis, at hælsinurnar ikki forðaðu honum í at kappast, men tað gekk ikki longur.

 - Eftir seinasta kappingarár versnaði hælsinan nógv, og eg valdi at binda um heilan fingur. Tað hevði við sær alternativa venjing og steðg frá kappingum, greiðir ungi íðkarin frá.

Ætlanin er at lata vera við at kappast, til kroppurin aftur er til reiðar. Júst nær tað verður, er ilt at siga, men onkrar kappingar eru í kalendaranum í august og september.

 - Men eri eg ikki klárur, royni eg at venja til næsta kappingarár, sigur Eiri Jógvansson Glerfoss, sum viðgongur, at tað er øgiliga freistandi at kappast kortini.

Hava aðrar styrkir hesa ferð

Í Guernsey vóru tað Eiri Jógvansson Glerfoss og serliga Jónas Gunnleivsson Isaksen, sum fóru avstað við yvirskriftunum. Kvívíkingurin vann bæði 200 og 400 metur renningina og gjørdist landskendur upp á fáar dagar.

Hesa ferð væntar Eiri Jógvansson Glerfoss, at Føroyar eisini hava aðrar styrkir í frælsum ítrótti.

 - Langteinarenningin hevur tríggjar sterkar mans við í hálvmaraton, og tað verður spennandi at síggja, hvussu teir fara at klára seg, sigur skaddi sprintarin.

SÍ EISINI: Renna aftur langt á oyggjaleikum

 - Í longdarlopi hjá monnum er Tórur Mortensen styrkismettur høgt, og har hava vit góðan møguleika at fáa heiðursmerki, sigur Eiri J. Glerfoss, sum ætlar sær at fylgja væl við heimanífrá.